ఎలక్టోరల్ బాండ్స్(Electoral Bonds) ద్వారా తాము నిధులు తీసుకోలేదని మూడు లెఫ్ట్ పార్టీలు సీపీఐ(ఎమ్), సీపీఐ, సీపీఐ(ఎమ్ఎల్) గతేడాదే ఈసీకి తెలియజేశాయి. ఈసీ తాజాగా బయటపెట్టిన వివరాల్లో ఈ విషయం వెల్లడైంది.
ఎలక్టోరల్ బాండ్స్(Electoral Bonds)కు తాము వ్యతిరేకమంటూ సీపీఐ(ఎమ్) ఈసీకి గతేడాది లేఖ రాసింది. ఎలక్టోరల్ బాండ్స్ ప్రకటించిన నాటి నుంచీ తాము ఈ స్కీమ్‌ను వ్యతిరేకించినట్టు సీపీఐ(ఎమ్) ఈసీకి తెలియజేసింది.
ఎలక్టోరల్ బాండ్స్ ద్వారా ఎటువంటి నిధులు స్వీకరించొద్దని తాము నిర్ణయించినట్టు తెలిపింది. పార్టీ సిద్ధాంతాలకు అనుగుణంగా తాము ఈ నిర్ణయం తీసుకున్నట్టు వెల్లడించింది.
సుప్రీం కోర్టులో ఎలక్టోరల్ బాండ్స్‌ను వ్యతిరేకిస్తూ పెండింగ్‌లో ఉన్న మూడు పిటిషన్లలో ఒకటి తమదేనన్న విషయాన్ని కూడా సీపీఐ(ఎమ్) తన లేఖలో ప్రస్తావించింది. ఈ లేఖపై పార్టీ అధ్యక్షుడు ఏచూరీ సంతకం చేశారు. కోర్టు ఆదేశాలకు మేరకు ఎలక్టోర్ వివరాలను బహిర్గతం చేసిన ఈసీ.. ఈ లేఖను కూడా బయటపెట్టింది.
